Madaxwaynihii hore ee Soomaaliya Maxamed Cabdullaahi Farmaajo ayaa muujiyey taageeradiisa ku aaddan mowqifka Madaxweynaha Dowlad-Goboleedka Koofur Galbeed Cabdicasiis Xasan Maxamed (Lafta-gareen), kaas oo uu ku adkeeyey muhiimadda ay leedahay ilaalinta Dastuurka, midnimada dalka iyo ku dhaqanka hannaanka sharciyeysan ee dowladnimada.
Madaxweyne Farmaajo ayaa xusay in Soomaaliya ay ku jirto marxalad siyaasadeed oo xasaasi ah, taas oo u baahan wada-tashi qaran, is-afgarad siyaasadeed iyo in si buuxda loo ilaaliyo qawaaniinta iyo heshiisyada lagu dhisay dowladnimada dalka.
Madaxwayne Farmaajo oo carrabka ku adkeeyey muddada kooban ee ka harsan muddo xileedka dowladdan ayaa sheegay in xasilloonida siyaasadeed iyo midnimada qaranku ay ku imaan karto oo keliya wadahadal furan, ixtiraamka Dastuurka iyo ka fogaanshaha tallaabo kasta oo hal dhinac ah oo dhaawici karta kalsoonida siyaasadeed iyo wadajirka ummadda Soomaaliyeed.
