Mudanayaasha Golaha Shacabka ee Baarlamaanka Federaalka Soomaaliya ayaa maanta cod aqlabiyad leh ku ansixiyey Heshiiska Aagga Ganacsiga Xorta ah ee Qaaradda Afrika (AfCFTA).
Codka la qaaday ayaa waxaa ogolaaday 145 xildhibaan, hal xildhibaan ayaa diiday, mana jirin cid ka aamustay, sida uu ku dhawaaqay Guddoomiyaha Golaha Shacabka, Sheekh Aadan Maxamed Nuur (Aadan Madoobe).
Guddoomiyaha ayaa sheegay in ansixinta heshiiskan ay Soomaaliya u fureyso fursado dhaqaale iyo ganacsi oo ballaaran, isagoo ku tilmaamay tallaabo taariikhi ah oo dalka ku biirinaysa suuq ganacsi oo mideysan oo ay ka mid yihiin dalalka Afrika.
Dhanka kale, Guddoomiye Aadan Madoobe ayaa fariin adag u diray xildhibaannada iyo wasiirrada aan kasoo qaybgelin kulamada Golaha, isagoo yiri:
“Waxaa jiro wasiiro iyo xildhibaanno Muqdisho ku sugan oo aan soo xaadirin kulamada Baarlamaanka, taasina ma aqbaleyno. Waajib baa idin saaran inaad ka qeyb gashaan shaqada qaranka.”
Guddoomiyaha ayaa ku booriyay dhammaan xubnaha Golaha in ay muujiyaan xilkasnimo iyo mas’uuliyad qaran, si loo dardar geliyo hawlaha sharci dejinta ee horyaalla Baarlamaanka Soomaaliya.
