Golaha Shacabka Baarlamaanka Federaalka Soomaaliya ayaa maanta laalay qaraar uu dhawaan soo saaray Ra’iisul Wasaare Xamse Cabdi Barre, kaas oo lagu doonayay in xilalka agaasime-waaxeedyada iyo qaar ka mid ah shaqooyinka dowladda lagu buuxiyo hannaan tartan furan.
Qaraarka ayaa waxaa oggolaaday in la laalo 136 xildhibaan, halka 2 xildhibaan ay diideen, sidoo kalena 2 xildhibaan ay ka aamuseen.
Ra’iisul Wasaare Xamse ayaa dhawaan faray wasiirrada, Guddiga Shaqaalaha Rayidka iyo mas’uuliyiinta kale ee dowladda in laga bilaabo 20-ka Sebteembar wajiga koowaad ee dib-u-habaynta shaqaalaha dowladda, iyadoo si gaar ah diiradda loo saarayo xilalka agaasime-waaxeedyada oo lagu buuxinayo hannaan tartan furan.
Go’aanka maanta ee Golaha Shacabka ayaa meesha ka saaray qaraarkaas, iyadoo tallaabadan ay saameyn ku yeelan karto qorshaha dib-u-habaynta iyo magacaabista xilalka sare ee hay’adaha dowladda.
