Maamulka Jubbaland ayaa soo bandhigay ciidamo cusub oo tababar dhammeystay, kuwaas oo lagu soo bandhigay duleedka magaalada Beled-Xaawo, xilli halkaasi ay ku sugan yihiin ciidamo ka tirsan dowladda Soomaaliya.
Ciidamadan ayaa watay gaadiid dagaal iyo hub kala duwan, taas oo muujinaysa heerka diyaar-garow militari ee ay gaareen. Saraakiisha Jubbaland ayaa sheegay in ciidamadan loo diyaariyay howlgal gaar ah oo la xiriira dib u qabsashada Beled-Xaawo.
Degmada Beled-Xaawo ayaa waxaa horey ugu sugnaa ciidamo ka amar qaata Dowladda Federaalka Soomaaliya, iyadoo bilo ka hor halkaas ay ka dhaceen dagaallo u dhexeeyay ciidamada dowladda iyo kuwa Jubbaland.
Gobolka Gedo ayaa haatan u muuqda mid martigelinaya xiisad iyo iska hor imaad u dhexeeya dowladda uu hoggaamiyo Xasan Sheekh Maxamuud iyo maamulka Jubbaland.
Bandhiggan ciidamada ayaa ku soo aadaya xilli ay jirto xiisad amni iyo mid siyaasadeed oo ka taagan gobolka, gaar ahaan Beled-Xaawo oo horey ay ula wareegeen ciidamada dowladda Federaalka.
Khilaafka u dhexeeya dowladda Federaalka iyo Jubbaland ayaa muddo soo jiitamayay, gaar ahaan arrimaha maamulka gobolka Gedo iyo cidda gacanta ku heysa.
