Safiirka dowladda Ingiriiska u fadhiya Soomaaliya Charles King ayaa si faahfaahsan uga hadlay xaaladda nololeed iyo shaqo ee uu kala kulmo magaalada Mogadishu, isagoo ku tilmaamay mid ka mid ah goobaha diblomaasiyadeed ee ugu khatarta badan caalamka.
Qoraal uu daabacay ayuu ku sheegay in subaxdiisa caadiga ah mararka qaar ay ku bilaabato dhawaaqa diyaaradaha dagaalka ee F-16 Fighting Falcon, taas oo beddesha digniinta saacadda hurdada. Waxa uu xusay in uu ku shaqeeyo xaalad amni oo aad u adag, isaga oo inta badan isticmaala gaadiid gaashaaman iyo qalab difaac si uu u fuliyo waajibaadkiisa.
Safiirka ayaa tilmaamay in safaaradda Ingiriiska ee Muqdisho dib loo furay sannadkii 2013, iyadoo United Kingdom ay ka mid ahayd dalalkii ugu horreeyay ee reer Galbeed ah ee dib ugu soo laabtay Soomaaliya. Waxa uu sheegay in safaaraddu ka shaqeyso arrimo kala duwan oo ay ka mid yihiin amniga, gargaarka bani’aadannimo, iyo iskaashiga caalamiga ah.
Charles King ayaa sidoo kale xusay in ay si dhow ula shaqeeyaan dowladda Soomaaliya, Midowga Afrika iyo Qaramada Midoobay si loo yareeyo khataraha kooxaha sida Al-Shabaab iyo ISIS, loona xakameeyo burcad-badeedda, isla markaana loo taageero shacabka Soomaaliyeed.
Inkasta oo uu sheegay in horumar la sameeyay, haddana wuxuu carrabka ku adkeeyay in guulahaasi ay weli jilicsan yihiin, isla markaana Soomaaliya ay tahay deegaan qalafsan oo u baahan dadaal joogto ah.
Dhanka kale, safiirku waxa uu xusay in inkastoo xaaladda amni ay adag tahay, haddana ay jiraan dadaallo diblomaasiyadeed oo caadi ah sida kulamo iyo xaflado lagu xoojinayo xiriirka, isagoo tusaale u soo qaatay munaasabad lagu xusay Burns Night oo lagu maamuuso gabyaaga reer Scotland ee Robert Burns, taas oo ay ka qeyb galeen diblomaasiyiin kala duwan.
Ugu dambeyn, safiirka ayaa sheegay in joogitaankooda Soomaaliya uu muhiim u yahay danaha wadajirka ah ee Soomaaliya, Ingiriiska iyo beesha caalamka, isagoo tilmaamay in fahamka xaaladda dalka iyo dhisidda xiriirro ay qeyb weyn ka tahay shaqadooda.
