Ugu yaraan afar dagaalame oo ka tirsan Maleeshiyaadka Al-Shabaab ayaa lagu dilay iska horimaad ka dhacay deegaanada Najo iyo Guracho ee magaalada Garissa, sida uu qoray wargeyska The Star ee Kenya.
Booliiska ayaa sheegay in laga soo qabtay hub ay ka mid yihiin laba qori AK-47 ah, hal qori weyn oo PKM ah, rasaas fara badan, iyo qalab isgaarsiineed oo ay wateen raggii la dilay.
Wararka booliisku soo saaray ayaa tilmaamaya in afartaasi ay baacsanayeen aagga iyagoo qorsheynayay weerarro ka dhan ah ciidamada ammaanka iyo xarumaha dowladda, balse ay ciidamada gaar ah ee Kenya Special Operations Group (SOG) u dhigeen dabin kadib markii ay saacado la socdeen dhaqdhaqaaqooda.
Sida la sheegay, argagixisada waxaa markii hore arkay drone kormeer ah, kadibna unugyada ciidamada ayaa daba socday ilaa ay ku weerareen, taasoo sababtay iska horimaad culus oo ay ku dhinteen dhammaan afartii.
Booliiska ayaa sheegay in howlgalkaan uu yahay guul kale oo muhiim ah oo qayb ka ah hawlgallo isku xiran oo lagu wiiqayo awoodda Al-Shabaab.
Deegaanka uu weerarku ka dhacay ayaa loo arkaa meel ay Al-Shabaab si fudud uga gudubto xuduudda Soomaaliya, si ay weerarro uga fuliyaan gudaha Kenya. Kooxdu waxay dhigtay waxyaabaha qarxa waddooyinka waaweyn, waxayna beegsadaan saldhigyada amniga.
Al-shabaab ayaa dhowr jeer weeraro ka geystay gudaha dalka Kenya, iyagoo bartilmaameedsaday saldhigyada ciidamada dalkaasi.
