Ra’iisul Wasaarihii hore ee Soomaaliya, Xasan Cali Kheyre, ayaa si kulul uga falceliyay xukunka saddexda sano ee xabsiga ah ee maanta lagu riday Sacdiyo Macallin Cali Xasan (Sacdiyo Bajaaj).
Kheyre ayaa sheegay in xarigga iyo xukunka Sacdiyo Bajaaj uu si toos ah u amray Madaxweyne Xasan Sheekh Maxamuud, isagoo ku tilmaamay tallaabadaasi mid muujinaysa dulmi, aargoosi siyaasadeed iyo ku-takrifal awood.
Waxa uu sheegay in Sacdiyo Bajaaj aysan ahayn dambiile balse ay tahay hooyo u halgamaysay quudinta qoyskeeda, isla markaana loo ciqaabay cabbiridda aragtideeda, taas oo uu sheegay inay tahay xuquuq uu dammaanad qaadayo Dastuurka Soomaaliya.
Sidoo kale, Kheyre ayaa ku eedeeyay Maxkamadda Gobolka Banaadir inay qeyb ka noqotay fulinta dano siyaasadeed, isagoo xusay in xukunka Sacdiyo uu dhaawacayo kalsoonida shacabka ee garsoorka dalka.
