Maxkamadda Gobolka Banaadir ayaa maanta xukun saddex sano oo xarig ah ku ridday Sacdiyo Macallin Cali, oo loo yaqaan Sacdiyo Bajaaj, kadib dhageysiyo kala duwan oo ay maxkamaddu u qabatay dacwaddeeda.
Sacdiyo Bajaaj ayaa ku jirtay xabsi ku dhow saddex bilood, tan iyo markii loo xiray eedeymo la xiriira kicin dadweyne iyo abaabulka banaanbaxyo ka dhan ah dowladda oo ka dhacay magaalada Muqdisho.
Qareennada difaacayay Sacdiyo ayaa si degdeg ah uga horyimid go’aanka maxkamadda, iyagoo sheegay inaysan ku qanacsanayn xukunka la riday.
“Sacdiyo kuma qancin go’aanka maxkamadda, maxkamaddu waxay isticmaashay go’aan adag oo laga baaqsan karay,” ayuu warbaahinta u sheegay Abuukaate Maxamed Sheekh, oo ka mid ah qareennada difaaca.
Sidoo kale, kooxda qareennada ayaa shaacisay inay racfaan ka qaadan doonaan xukunka maanta ay ridday Maxkamadda Gobolka Banaadir, iyagoo sheegay inay adeegsan doonaan dhammaan fursadaha sharci ee u bannaan.
Xukunkan ayaa kusoo aadaya iyadoo dacwadda Sacdiyo Bajaaj ay muddooyinkii dambe si weyn u hadal hayeen bulshada iyo warbaahinta, isla markaana ay ka dhalatay dood ku saabsan xorriyadda hadalka iyo sharciga la xiriira isu-soo-baxyada dadweynaha.
