Khilaafka ka taagan guddiga loo magacaabay qabashada doorashada Guddoomiyaha Golaha Shacabka ee Baarlamaanka Federaalka Soomaaliya ayaa sii xoogeysanaya, iyadoo musharrixiinta qaar ay su’aal gelinayaan sharcinimada iyo dhexdhexaadnimada guddiga.
Musharraxa u taagan xilka Guddoomiyaha Golaha Shacabka, Xildhibaan Saadaad Maxamed Nuur, ayaa sheegay in qaabka loo dhisay Guddiga Doorashada uu si cad uga hor imaanayo Qodobka 33-aad, Farqaddiisa 2-aad ee Xeer-hoosaadka Golaha Shacabka.
Saadaad ayaa ku dooday in guddiga lagu daray xubno ka tirsan madaxda guddiyada joogtada ah ee Baarlamaanka, kuwaas oo sida uu sheegay aanu xeer-hoosaadku u oggolaanayn inay ka mid noqdaan guddiga doorashada. Wuxuu sheegay in arrintaasi dhaawici karto hufnaanta, dhexdhexaadnimada iyo kalsoonida lagu qabo geeddi-socodka doorashada.
Musharraxa ayaa ugu baaqay Guddoonka Golaha Shacabka inay dib u eegis degdeg ah ku sameeyaan guddiga, isla markaana ay waafajiyaan xeer-hoosaadka si loo xaqiijiyo in doorashadu u dhacdo si caddaalad iyo daahfurnaan leh.
Hadalkan ayaa kusoo beegmaya xilli guddiga doorashada uu yeeshay guddoonkiisa, isla markaana la dardargelinayo diyaarinta doorashada Guddoomiyaha Golaha Shacabka, taas oo si rasmi ah loogu muddeeyay 10-ka Agoosto 2026.
Doodda ka dhalatay guddiga doorashada ayaa sare u qaaday xiisadda siyaasadeed ee hareysay doorashada Guddoomiyaha Golaha Shacabka, iyadoo la filayo in maalmaha soo socda ay soo baxaan mowqifyo dheeraad ah oo ay qaataan musharrixiinta iyo xubnaha Baarlamaanka.
