Warar lagu kalsoonaan karo ayaa sheegaya in wareegga labaad ee wada-hadallada u dhexeeya Dowladda Federaalka Soomaaliya (DFS) iyo dhinacyada mucaaradka, oo ay dhexdhexaadinayaan wakiillo ka socda Beesha Caalamka, dib loogu muddeeyay 20-ka July 2026.
Sida xogaha la helayo ay tilmaamayaan, wakiillada Beesha Caalamka ayaa labada dhinac ku wargeliyay in maalintaas ay mar kale isugu yimaadaan kulan fool ka fool ah si loo sii ambaqaado dadaallada lagu xallinayo khilaafaadka siyaasadeed ee dalka.
Inta ka horreysa kulankaas, waxaa la qorsheeyay in dhinacyada si gaar-gaar ah loola kulmo, iyadoo diiradda la saarayo sidii loo abuuri lahaa jawi isu-soo-dhowaansho iyo isfaham, maadaama weli ay jiraan kala aragti duwanaansho weyn, gaar ahaan u dhexeeya Villa Somalia iyo Golaha Mustaqbalka Soomaaliyeed.
Dhanka kale, waxaa magaalada Muqdisho ka socda kulamo siyaasadeed oo gooni-gooni ah oo ay yeelanayaan Dowladda Federaalka, Golaha Mustaqbalka Soomaaliyeed iyo guddiga farsamo ee ka socda madaxweynihii hore ee Soomaaliya, Maxamed Cabdullaahi Farmaajo.
Ilo xog-ogaal ah ayaa sheegaya in kulamadan looga arrinsanayo ajandayaasha iyo qorshayaasha ay dhinac walba la tegi doonaan kulanka loo qorsheeyay 20-ka July, iyadoo la falanqeynayo qodobada laga yaabo in lagu gorfeeyo wada-hadalka iyo istaraatiijiyadda siyaasadeed ee ay dhinacyadu qaadan doonaan.
Dhexdhexaadiyeyaasha Beesha Caalamka ayaa weli wada dadaallo lagu doonayo in la isku soo dhoweeyo mowqifyada dhinacyada, si wadahadallada soo socda ay u noqdaan kuwo horseeda is-afgarad siyaasadeed.
