Madaxweynaha Somaliland Cabdiraxmaan Maxamed Cabdilaahi (Cirro), ayaa saaka subaxnimadii booqday Dhakhtarka Guud ee Hargeysa, halkaas oo lagu daweynayo qaar ka mid ah dadkii ku dhaawacmay shaqaaqadii dhawaan ka dhacday magaalada Boorama.
Madaxweynuhu waxa uu mid mid u booqday bukaannada, isaga oo u muujiyey dareen naxariis leh, isla markaana ka xog-waraystay xaaladdooda caafimaad. Waxa uu carrabka ku adkeeyay in dowladdu si buuxda u garab taagan tahay dhammaan dadkii ku waxyeelloobay dhacdadaas, isla markaana ay heli doonaan daryeel iyo taageero joogto ah.
Madaxweynaha ayaa Wasaaradda Caafimaadka, maamulka iyo shaqaalaha Dhakhtarka Guud ee Hargeysa uga mahadnaqay dedaalka ay ku bixiyeen daryeelka bukaannada, isaga oo ku bogaadiyey sida xilkasnimada leh ee ay u gudanayaan waajibaadkooda caafimaad ee ay bulshada u hayaan.
Sidoo kale, Madaxweynuhu waxa uu tacsi u diray qoysaska ay waxyeelladu gaadhay, isaga oo Alle SWT uga baryey in uu caafimaad degdeg ah siiyo dadka dhaawacmay, samir iyo iimaanna ka siiyo eheladii ay dhibaatadu taabatay.
