Xukuumadda Somaliland ayaa masuuliyiin cusub u magacowday degmooyinka Badhan iyo Laasqoray ee gobolka Sanaag.
Warqad ka soo baxday Wasaarada dowladdaha Hoose ee Soomaaliland, ayaa lagu magacaabay Xuseen Maxamed Xasan Guddoomiyaha Degmada Badhan, halka Aadan Cabdilaahi Jibriil loo magacaabay Guddoomiye Ku-xigeenka Degmada Badhan. Magacaabistan ayaa lagu saleeyay qodobbada Dastuurka Jamhuuriyadda Somaliland iyo Xeerarka Dawladaha Hoose.
Wasaaradda ayaa sheegtay in ujeeddada magacaabistu tahay xoojinta maamulka degmooyinka, hagaajinta adeegyada bulshada, iyo dardargelinta amniga iyo horumarka deegaannada.
Magacaabistan ayaa imanaysa xilli la dareemayo wanaajinta xiriirka siyaasadeed ee Somaliland iyo Puntland, kuwaas oo labaduba sheegta saamayn iyo maamul ku leh qaybo ka mid ah gobolka Sanaag, gaar ahaan degmooyinka Badhan iyo Laasqoray.
Gobolka Sanaag ayaa muddo dheer ahaa meel ay isku haystaan maamullada Somaliland, Puntland iyo maamulka Waqooyi Bari, arrintaas oo marar badan dhalisay loollan siyaasadeed iyo mid maamul.
Ilaa hadda wax war rasmi ah kama soo bixin dhinacyada kale ee arrintan quseeya, balse indhaha ayaa lagu hayaa sida ay u saameyn doonto xaaladda maamulka iyo amniga ee gobolka Sanaag.
