Masar ayaa sii xoojisay dadaallada diblomaasiyadeed ee Geeska Afrika, iyadoo Wasiirka Arrimaha Dibadda Masar, Badr Abdelatty, uu wadahadallo gooni-gooni ah la yeeshay Wasiirka Arrimaha Dibadda Soomaaliya, Cabdisalaan Cabdi Cali, iyo dhiggiisa Eritrea, Cismaan Saalax.
Sida ay sheegtay Wasaaradda Arrimaha Dibadda Masar, kulamada ayaa diiradda lagu saaray xoojinta xiriirka labada dhinac, isku dubbaridka mowqifyada siyaasadeed iyo ka wadahadalka xaaladihii ugu dambeeyay ee Geeska Afrika iyo amniga Badda Cas.
Qaahira ayaa mar kale ku celisay in amniga iyo xasilloonida Geeska Afrika ay si toos ah ula xiriiraan amniga qaranka Masar, gaar ahaan marka la eego Badda Cas iyo marinada muhiimka ah ee ganacsiga caalamiga ah.
Kulamadan ayaa kusoo aadaya xilli Masar, Eritrea iyo Soomaaliya ay sare u qaadeen iskaashigooda dhinacyada amniga, dekedaha iyo gaadiidka badda.
Toddobaadkii hore, Soomaaliya iyo Masar ayaa kala saxiixday heshiis is-afgarad (MoU) oo lagu xoojinayo iskaashiga gaadiidka badda iyo horumarinta dekedaha, halka Masarna ay heshiis la mid ah hore ula gashay Eritrea.
Sidoo kale, Masar, Eritrea iyo Soomaaliya ayaa ku adkeystay in amniga iyo maamulka Badda Cas ay tahay mas’uuliyad u taalla dalalka xeebaha leh, iyagoo muujiyay in mustaqbalka gobolka ay tahay in ay go’aamiyaan dowladaha ku teedsan badda.
Dhanka kale, dhaq-dhaqaaqyadan ayaa sii kordhiyay walaaca Itoobiya. Dowladda Itoobiya ayaa hore Masar ugu eedeysay inay waddo istiraatiijiyad lagu go’doominayo Addis Ababa, kaddib markii Itoobiya ay mar kale ku celisay in helitaanka marin badeed uu yahay dano qaran.
Ra’iisul Wasaaraha Itoobiya, Abiy Axmed, ayaa sheegay in dalkiisu uu sii wadi doono dadaallada uu ku raadinayo marin badeed isagoo adeegsanaya waddooyin nabadeed iyo diblomaasiyadeed.
Isku soo wada duuboo, kulamadii ugu dambeeyay ayaa muujinaya in Masar, Soomaaliya iyo Eritrea ay sii xoojinayaan iskaashigooda siyaasadeed iyo amni, iyadoo arrintan ay saameyn ku yeelan karto isu-dheellitirka awoodaha Geeska Afrika iyo loollanka gobolka.
