Hoggaamiyaha Dawlad Goboleedka SSC-Khaatumo, Cabdiqaadir Axmed Aw-Cali, ayaa maanta kulan muhiim ah la yeeshay Taliyaha Ciidanka Xoogga Dalka Soomaaliyeed, Sareeye Gaas Odawaa Yuusuf Raage.
Kulankan ayaa ka dhacay hoyga uu Muqdisho ka degan yahay Hoggaamiyaha SSC-Khaatumo, waxaana lagu lafaguray arrimo dhowr ah oo quseeya amniga, wada-shaqeynta labada dhinac, iyo sidii loo dardargelin lahaa iskaashi buuxa oo lagu xaqiijinayo midnimada iyo amniga Jamhuuriyadda Federaalka Soomaaliya.
Hoggaamiyaha SSC-Khaatumo ayaa uga mahadceliyey Taliyaha Ciidanka Xoogga Dalka taageerada joogtada ah ee ay siiyaan shacabka SSC-Khaatumo, isaga oo xusay muhiimadda ay leedahay in la xoojiyo wada-shaqeynta si looga hortago khataraha amni ee ka jira gobollada SSC.
Taliyaha Ciidanka Xoogga Dalka, Sareeye Gaas Odawaa Yuusuf Raage, ayaa dhankiisa adkeeyey diyaar garowga ciidanka ee ku aaddan difaaca dalka iyo ilaalinta midnimada ummadda Soomaaliyeed. Waxa uu sidoo kale sheegay in Taliska Xoogga Dalka diyaar u yahay in uu la shaqeeyo maamulka SSC-Khaatumo si loo helo amni waara iyo kalsooni shacabka dhexdooda ah.
Kulanka ayaa kusoo dhammaaday isfaham iyo ballanqaad ku aaddan sii wadidda wada-shaqeynta iyo kor u qaadidda doorka ciidamada Soomaaliyeed ee difaaca qaranka.
