Madasha Samatabixinta Soomaaliyeed ayaa si kulul u cambaareysay xarigii iyo afduubkii ciidamada booliiska ee degmada Xamar Weyne ugu geysteen Nabadoon Xuseen Maxamed Maxamuud Xaadoole, kaasi oo ka hor yimid boobka iyo barakicinta ay dowladdu ka waddo magaalada Muqdisho.
Madasha ayaa ku tilmaantay xariga Nabadoon Xaadoole mid sharci-darro ah oo ka dhashay mowqifkiisa geesinimada leh ee uu kaga horyimid boobka dhulka iyo hantida shacabka, iyadoo sheegtay in tallaabadan ay muujinayso dulqaad yarida Madaxweyne Xasan Sheekh Maxamuud iyo isku day lagu caburiyo codka shacabka.
“Xorriyadda hadalku waa xuquuq dastuuriyan la ilaaliyo, mana bannaana in qof lagu ciqaabo difaacista hantida iyo xuquuqda shacabka Soomaaliyeed,” ayaa lagu yiri qoraalka kasoo baxay Madasha.
Sidoo kale, Madasha Samatabixinta waxay ugu baaqday Madaxweynaha inuu joojiyo boobka iyo barakicinta shacabka Muqdisho, halka shacabka Soomaaliyeedna loogu baaqay inay si mideysan ugu istaagaan difaaca dhulkooda iyo hantidooda.
