Shacabka magaalada Mandheera ee gobolka Waqooyi Bari Kenya ayaa dhigay bannaanbax ballaaran, iyagoo ku dalbanaya in magaalada laga saaro ciidamada Jubbaland ee uu hoggaamiyo Axmed Madoobe.
Ciidamadan oo dhowaan laga saaray degmada Beledxaawo iyo deegaanada ku xeeran ayaa dowladda Kenya dejisay gudaha xerooyin ku yaalla Mandheera. Balse shacabka deegaanka ayaa sheegay in ciidamadaasi ay ku hayaan xadgudubyo kala duwan isla markaana ay caqabad ku noqdeen nolol maalmeedkooda.
Duqa magaalada Mandheera, Maxamed Khaliif, ayaa dhawaan si cad ugu baaqay Madaxweynaha Kenya in uu tallaabo degdeg ah ka qaado oo uu magaalada ka saaro ciidamada Jubbaland. Sidoo kale, Wasiirkii hore ee Gaashaandhigga Kenya ayaa arrintan ka hadlay, taas oo sii kordhisay cadaadiska lagu hayo dowladda Kenya oo ilaa hadda ka gaabsanaysa in ay si rasmi ah uga hadasho xaaladda ka taagan Mandheera.
Xiisadda sii kordheysa ayaa ka dhashay walaaca bulshada oo ku saabsan amni-darrada iyo faragelinta ciidamo shisheeye ku joogaan gudaha Kenya.
