Waxaa magaalada Muqdisho si weyn uga dhex aloosan dood kulul oo ku saabsan qorshaha ay Dowladda Federaalka Soomaaliya ku doonayso inay ku meel-mariso cutubyada dhiman ee Dastuurka dalka, iyadoo ay soo baxayaan baaqyo looga digayo cawaaqibka ka dhalan kara deg-degga lagu hayo dukumeentigan masiiriga ah.
Xildhibaan Maxamed Aadan Daahir (Caanooy), oo ka mid ah mudaneyaasha miisaanka culus ee Baarlamaanka, ayaa si cad u muujiyey walaac xooggan oo ku aaddan hannaanka wax-ka-beddelka.
Xildhibaanka ayaa su’aal geliyey suurtagalnimada in muddo hal usbuuc ah lagu akhriyo, laguna ansixiyo Dastuur qaran, isagoo tallaabadaas ku tilmaamay mid dhaawacaysa kalsoonida dadweynaha iyo doorka xeer-dejinta ee Baarlamaanka.
“Dastuurku waa heshiiska ugu sarreeya ee ummadda, mana aha dukumeenti lagu dedejin karo. Go’aan kasta oo aan wada-tashi lahayn wuxuu dhaawacayaa mustaqbalka qaranka,” ayuu yiri Xildhibaan Caanooy oo dalbaday in la helo waqti ku filan iyo dood hufan oo ay qeyb ka yihiin dhammaan saamileyda siyaasadda.
Walaacan ayaa imaanaya xilli ay horay u qaadaceen geeddi-socodka dastuurka maamulada Puntland iyo Jubbaland, iyo waliba xubnaha mucaaradka ee u arka in madaxtooyadu ay isku koobayso go’aamada waaweyn ee dalka.
Xaaladda Dastuurka Soomaaliya ayaa mareysa marxalad xasaasi ah, iyadoo sannadkan 2026 uu u muuqdo mid go’aamin doona mustaqbalka nidaamka federaalka iyo xasilloonida siyaasadeed ee dalka
