Hal qof ayaa ku dhintay kadib markii gaari nooca Laylaa ah uu ku dhacay bar koontarool oo ku yaalla degmada Bangeelle ee gobolka Galgaduud, sida ay sheegeen ilo deegaanka ah.
Gaarigan oo la sheegay inuu kasoo ambabaxay magaalada Muqdisho, ayaa si lama filaan ah ugu soo dhacay goob ay ku sugnaayeen ciidamada deegaanka. Tallaabadaasi waxay keentay in ciidamadu furaan rasaas si ay u joojiyaan gaariga, kadib markii ay uga shakiyeen fal suurtagal ah oo amni darro keeni kara.
Rasaasta ay fureen ciidamada ayaa sababtay dhimashada hal nin oo rakaab ahaa, kaasoo saarnaa gaariga islamarkaana uu dhaawac kasoo gaaray dhalada gaariga uu ka daaqayay xilliga ay rasaastu dhacaysay.
Ciidamada booliiska ee degmada Caabudwaaq ayaa gaaray goobta dhacdada, waxayna qaadeen meydka marxuumka si baaritaan dheeraad ah loo sameeyo.
Mas’uuliyiinta deegaanka weli kama aysan hadlin dhacdadan, hase yeeshee dadka deegaanka ayaa ka muujiyay walaac ku aaddan sida ay ciidamada ula dhaqmayaan xaaladaha amni ee ka jira goobaha baraha koontaroolka.
Dhacdadan ayaa imaneysa xilli gobolka Galgaduud uu wajahayo xaalado amni oo isbeddelaya, iyadoo la dareemayo feejignaan dheeraad ah oo ay sameynayaan ciidamada ammaanka.
