Golaha Wasiirrada ee Xukuumadda Federaalka Soomaaliya ayaa maanta yeeshay kulan gaar ah oo uu guddoominayay Ra’iisul Wasaaraha dalka, Xamsa Cabdi Barre.
Kulanka ayaa si qoto dheer loogu falanqeeyay xaaladda amniga guud ee dalka, iyadoo la isku waafaqay xoojinta iskaashiga iyo isu-dubaridka hay’adaha amniga si loo dardargeliyo sugidda xasiloonida.
Sidoo kale, Golaha ayaa ka dooday muhiimadda doorka ay bulshada ku leedahay sugidda nabadda iyo wadashaqeynta laamaha ammaanka.
Waxaa sidoo kale kulanka diiradda lagu saaray diyaar-garowga munaasabadaha ciidda, toddobaadka xorriyadda iyo imtixaanaadka shahaadiga ah ee soo socda, iyadoo la adkeynayo muhiimadda ay leedahay ilaalinta amniga ardayda iyo guud ahaan shacabka Soomaaliyeed.
Golaha Wasiirrada ayaa si weyn u bogaadiyay guusha taariikhiga ah ee ay Soomaaliya ku gaartay ka mid noqoshada Hey’adda Qaramada Midoobey ee Horumarinta Magaalooyinka iyo Deegaanka (UN-HABITAT), taasoo loo arko mid muujineysa kalsoonida caalamka ee dib u dhiska iyo horumarka Soomaaliya.
