Wasiiru dowlaha Arrimaha Dibadda iyo Iskaashiga Caalamiga Cali Maxamed Cumar ayaa maanta oo Axad ah xafiiskiisa wasaaradda ee magaalada Muqdisho kula kulmay safiirka Jamhuuriyadda Suudaanu fadhiya Soomaaliya, Abdulrahman Khalil Ahmed Abker Afendi, waxayna ka wada hadleen siyaabaha loo xoojin karo iskaashiga labada dal ee walaalaha ah, sida ku xusan qoraal kasoo baxay wasaaradda.
Kulanka ayaa looga hadlay arrimaha ugu waaweyn ee saameynaya Suudaan, oo ay ku jiraan colaadda iyo rabshadaha ka socda magaalada El-Fasher, halkaas oo gargaarka bini’aadantinimo aad loo xaddiday, iyagoo sidoo kale ka wada hadlay arrimo badan oo xuquuqda aadanaha ah.
Dhinacyadan ayaa sidoo kale dib u eegis ku sameeyay xaaladihii ugu dambeeyay ee dhinaca bini’aadantinimada, amniga iyo siyaasadda ee dalka Suudaan, iyagoo carrabka ku adkeeyay muhiimadda ay leedahay ilaalinta rayidka iyo xaqiijinta in gargaarku uu gaaro dadka u baahan.
“Wasiiru dowlaha Arrimaha Dibadda iyo Iskaashiga Caalamiga ayaa caddeeyay in Soomaaliya ay taageereyso midnimada, madaxbannaanida iyo xasilloonida Suudaan, isagoo carabka ku adkeeyay in xal nabadeed iyo mid siyaasadeed ay muhiim tahay si loo xaqiijiyo xasillooni waarta iyo ammaanka dalka.” Ayaa lagu yiri qoraalka.
