Taliyaha Hay’adda Nabad Sugidda iyo Sirdoonka Qaranka (NISA), C/llaahi Sanbaloolshe, Xildhibaano ka tirsan Baarlamaanka Soomaaliya ee ka soo jeeda Gobolka Hiiraan iyo wasiirka arrimaha gudaha ee maamulka Hirshabelle Cabdi Daahir Guure-Karoore ayaa maanta gaaray degmada Moqokori ee Gobolkaasi.
Mas’uuliyiintan ayaa degmada Moqokori u tagay siddii ay u dhiirrigelin lahaayeen ciidamada Xoogga Dalka iyo Macaawiisleyda ee dagaalka kula jira Maleeshiyaadka Al-shabaab.
Taliyaha iyo Mas’uuliyiinta kale ayaa kulammo la qaatay saraakiisha ciidamada iyo maamulka deegaanka, waxaa ayna kala hadleen dardar gelinta dagaalanka ka dhanka ah Al-shabaab.
Socdaalkan ayaa kusoo aadaya iyadoo labadii maalmood ee la soo dhaafay dagaallo culus oo khasaare lagu gaarsiiyay Al-shabaab ay ka dhaceen duleedka deegaanka Mabaax iyo aagga degmada Aadan Yabaal ee xadka kala qeybiya gobolada Hiiraan iyo Shabeellada dhexe.
