Hoggaamiyahii koox hubeysan oo Falastiini ah oo ka soo horjeedda Xamaas kana hawlgasha Qasa ayaa la dilay, sida ay sheegtay warbaahinta dawladda Israa’iil, Khamiisti. Arrintan ayaa loo arkaa dhabar-jab ku yimid dadaallada Israa’iil ee lagu taageerayo qabiillo Falastiini ah si ay uga hortagaan dhaqdhaqaaqa Islaamiga ah.
Yaasir Abu Shabaab oo ahaa hoggaamiyaha qabiil Beedowiin islamarkaana deggenaa Rafah oo ku taalla koonfurta Qasa ayaa hoggaaminayay kooxda ugu caansan dhowr kooxood oo yaryar oo ka soo horjeeda Xamaas, kuwaas oo la arkayay tan iyo intii uu socday dagaalka billowday in ka badan laba sano ka hor.
