Dowladda Uganda ayaa Midowga Yurub kala hadashay mustaqbalka howlgalka Midowga Afrika ee Soomaaliya ee AUSSOM iyo sidii loo heli lahaa maalgelin joogto ah oo la isku halleyn karo.
Wasiirka Difaaca Uganda, Kiryowa Kiwanuka, ayaa magaalada Kampala kulan kula yeeshay wafdi uu hoggaaminayay ku-xigeenka Safiirka Midowga Yurub ee Uganda, Eole Sury, iyadoo kulanka diiradda lagu saaray howlgalka AUSSOM iyo taageerada caalamiga ah ee loo fidiyo.
Uganda ayaa sheegtay in Midowga Yurub uu yahay mid ka mid ah saaxiibbada muhiimka ah ee taageera howlgalka Soomaaliya.
Midowga Yurub ayaa bishii Abriil ansixiyay €75 milyan oo dheeraad ah oo loogu talagalay AUSSOM, gaar ahaan gunnooyinka ciidamada, qalabka aan halista ahayn iyo adeegyada kale ee howlgalka.
Midowga Yurub ayaa sidoo kale sheegtay in taageeradii ay siinaysay howlgallada Midowga Afrika ee Soomaaliya tan iyo 2007 ay gaartay ku dhowaad €2.8 bilyan.
Dalalka ciidamadooda ku biiriya AUSSOM ayaa doonaya hannaan maalgelin oo muddo dheer ah oo la saadaalin karo, xilli Soomaaliya ay ku jirto marxalad kala-guur amni.
Uganda ayaa ahayd dalkii ugu horreeyay ee ciidamo geeya Soomaaliya sanadkii 2007, waxayna qeyb ka ahayd wejiyadii kala duwanaa ee howlgalka Midowga Afrika.
AUSSOM ayaa si rasmi ah u bilaabatay Janaayo 2025, iyadoo beddeshay ATMIS, waxaana waajibaadka hadda loo oggolaaday uu soconayaa illaa 31-ka December 2026.
Kulanka Kampala lagama soo saarin heshiis cusub oo maalgelin ah ama go’aan kama dambeys ah oo ku saabsan mustaqbalka AUSSOM.
