Urur Goboleedka IGAD wuxuu si adag u cambaareynayaa weerarkii fulaynimada ahaa ee kooxda argagixisada ah ay ka fuliyeen Xarunta Baarista Jilacow ee magaalada Muqdisho.
ciidamada amniga oo si degdeg ah oo geesinimo leh u joojiyay weerarka, iyagoo ka hortagay khasaare dheeraad ah oo nafeed, taas oo muujineysa adkaysiga iyo u heellanaanta ay shacabka iyo dowladda Soomaaliya u leeyihiin la-dagaallanka argagixisada.
IGAD waxay ammaaneysaa xirfadda iyo geesinimada ciidamada amniga ee Soomaaliya, kuwaas oo jawaab degdeg ah bixiyay si looga hortago musiibo weyn. Weerarkan, oo dhacay kaddib guulo waaweyn oo ay ciidamada xoogga dalka Soomaaliyeed ka gaareen gobolka Shabeellaha Hoose iyo howl-galladii lagu dilay saraakiil sare oo ka tirsan argagixisada, wuxuu muujinayaa niyad-jab iyo quus sii kordheysa oo kooxdaas haysata, iyo guusha dadaallada socda ee lagula dagaallamayo argagixisada.
Mudane Dr. Workneh Gebeyehu, Xoghayaha Guud ee IGAD, ayaa muujiyay tacsi iyo garab istaag isagoo yiri:
“Weerarkan ma wiiqi karo geesinimada shacabka Soomaaliyeed ama go’aanka adag ee gobolka. IGAD waxay si buuxda ula taagan tahay shacabka iyo Dowladda Federaalka Soomaaliya dagaalka ka dhanka ah argagixisada iyo dadaallada lagu xaqiijinayo nabad iyo xasillooni waarta.”
IGAD waxay mar kale ku celinaysaa baaqeeda ku aaddan in la xoojiyo iskaashiga heer gobol iyo heer caalami si argagixisada looga takhaluso loona xoojiyo nabadda, xasilloonida, iyo adkaysiga guud ee Geeska Afrika.
