Waxaa socda dadaallo lagu dejinayo xiisadda siyaasadeed ee u dhexeysa dowladda Federaalka Soomaaliya iyo mucaaradka, kaddib markii xildhibaanno ka tirsan Baarlamaanka oo ergo ka ah Madaxweynaha Soomaaliya Xasan Sheekh Maxamuud ay gaareen guriga Madaxweynihii hore Sheekh Shariif Sheekh Axmed.
Ergadan ayaa la sheegay inay kala hadlayaan sidii loo dejin lahaa khilaafka siyaasadeed iyo muranka ka dhashay dibadbaxyada ay mucaaradku qorsheynayaan inay ka dhigaan magaalada Muqdisho.
Sidoo kale, xubnaha ergada ah ayaa horay kulan ula yeeshay Ra’iisul Wasaarihii hore Xasan Cali Kheyre, balse wararka ayaa sheegaya in kulankaasi uu kusoo dhammaaday natiijo la’aan.
Dowladda Federaalka Soomaaliya ayaa si cad uga hortimid dibadbaxyada mucaaradka, iyadoo sheegtay in la oggol yahay oo keliya goobo cayiman oo lagu qaban karo bannaanbaxyada, halka mucaaradkuna ay diideen shuruudahaasi, taasoo sii kordhisay xiisadda siyaasadeed ee ka taagan Muqdisho.
