Waxaa meel gabagabo ah maraya xiritaanka buq ka baxday tuulada Baareey oo ka tirsan degmada Jowhar.
Dadaalo ay sameeyeen maamulka gobolka kan degmada iyo shacabka ku nool tuulada Baarey ayaa suurtogeliyay in inta badan biyihii ka baxayay buqda la xakameeyo.
Guddoomiyaha tuulada baarey ayaa u sheegtay radio jowhar in uu rajo weyn ka qabo in caawa la soo gabagabeeyo xiritaanka buqda xalay ka baxday deegaanka Baareey.
Gudoomiye ku xigeenka gobolka Sh/dhexe Maxamed Cabdi Sheekh Xaandow iyo Guddoomiyaha Degmada Jowhar ahna Duqa Magaalada Cismaan Maxamed Muqtaar Baareey, ayaa maanta gaaray Tuulada Baarey oo wabiga Shabelle kasameeyay fatahaad oo saameyn kuyeelatay dadka deegaanka.
Booqashada mas’uuliyiintan ay ku tageen deegaanka Baareey ayaa waxa ay salka ku haysay sidii ay indhahooda ugu soo arki lahaayeen heerka ay gaarsiisan tahay baaxada buqda xalay ka baxday deegaanka Baareey.
Mas’uuliyiinta maamulka gobolka shabelaha dhexe uu ugu horeeyo guddoomiye ku xigeenka arrimaha siyaasadda maxamed cabdi Sheekh iyo guddoomiyaha degmada Jowhar Cismaan Maxamed Muqtaar   ayaa maanta oo dhan ku sugnaa buqda baareey iyagoo ka qeybqaadanayay sidii loo xiri lahaa buqdan.
Ugu danbeyn mas’uuliyiinta Maamulka gobolka iyo kan degmada jowhar ayaa u Mahadceliyay dadka deegaanka Baarey sida ay isu xilqaameen oo ay ugu dadaaleen in lagu guuleysto in inta badan buqda la xiro.
