Xildhibaanad Reys Qorane Abshir aAdam oo ka tirsan Golaha Shacabka Baarlamaanka Federaalka Soomaaliya, Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macallin Cabdulle, oo uu wehliyo Wasiirka Gargaarka iyo Maareynta Musiibooyinka Dowlad Goboleedka Galmudug, Cabdiraxmaan Maxamed Diiriye (Makaawi) ayaa booqasho shaqo ku gaaray degmada Caabudwaaq ee gobolka Galgaduud, halkaas oo ay u tageen qiimeynta xaaladda bani’aadannimo iyo baahiyaha mudnaanta leh ee bulshada deegaanka.
Wafdiga waxaa si diirran loogu soo dhaweeyay magaalada Caabudwaaq, waxaana munaasabadda soo dhaweynta ka hadlay Guddoomiyaha degmada Caabudwaaq, Guddoomiyaha Ururka Haweenka iyo qaar ka mid ah waxgaradka degmada, kuwaas oo adkeeyay muhiimadda ay booqashadani u leedahay bulshada deegaanka iyo rajada laga qabo in ay horseeddo gurmad iyo taageero dheeraad ah.
Wafdigaan oo ka hadlay ujeeddada booqashadooda ayaa sheegay in safarkoodu uu salka ku hayo qiimeyn dhab ah oo lagu ogaanayo xaaladda deegaanka, si loo xoojiyo gurmadka iyo taageerada la gaarsiinayo bulshada ay saameeyeen duruufaha bani’aadannimo.
