Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa si rasmi ah u magacaabay Wasiir cusub oo hoggaamin doona Wasaaradda Warfaafinta, Dhaqanka iyo Dalxiiska.
Go’aankan ayaa yimid kadib markii Ra’iisul Wasaaruhu tixraacay qodobka 120-aad, farqadiisa 2-aad iyo 3-aad ee Dastuurka Jamhuuriyadda Federaalka Soomaaliya, isla markaana uu la tashaday Madaxweynaha Jamhuuriyadda, Xasan Sheekh Maxamuud.
Cabdifataax Qaasim Maxamuud ayaa loo magacaabay Wasiirka cusub ee Wasaaradda Warfaafinta, halka xilka laga qaaday Wasiirkii hore Daa’uud Aweys.
Ra’iisul Wasaare Xamsa Cabdi Barre ayaa wasiirka cusub kula dardaarmay in uu si hufan u gutto waajibaadka loo igmaday, islamarkaana uu laba jibbaaro dadaalka horumarinta warfaafinta dalka.
Magacaabistan ayaa imaneysa xilli ay xukuumaddu wajahayo howlaha ballaaran ee dhinacyada warbaahinta, dhaqanka iyo dalxiiska, kuwaas oo muhiim u ah dib-u-dhiska iyo kobaca dalka.
