Maraykanka ayaa qaaday weerarro cusub oo uu ku beegsaday goobo ciidan oo ku yaalla xeebaha Iiraan, isagoo sheegay in tallaabadan ay jawaab u ahayd weerarro ay Iiraan ku qaaday maraakiibta ganacsiga ee maraya marin-biyoodka istaraatiijiga ah ee Hormuz.
Taliska Dhexe ee Ciidamada Maraykanka (CENTCOM) ayaa sheegay in bartilmaameedyada ay ka mid ahaayeen kaydadka gantaallada, xarumaha lagu kaydiyo diyaaradaha aan duuliyaha lahayn (drones), iyo xarumaha kormeerka milatariga ee xeebaha.
Dhanka kale, Iiraan ayaa sheegatay inay qaaday weerarro jawaab celin ah oo ay ku beegsatay saldhigyo ay ciidamada Maraykanku ku leeyihiin dalalka Kuwait iyo Bahrain, waxaana wararka hordhaca ah ay tilmaamayaan in digniino amni la bixiyay, isla markaana la hawlgeliyey nidaamyada difaaca cirka, iyadoo la baarayo khasaaraha ka dhashay weerarrada. Warbixinno hore ayaa sheegay inaan weli si rasmi ah loo xaqiijin khasaaraha ciidamada Maraykanka.
Madaxweyne Donald Trump ayaa ku hanjabay in Maraykanku uu qaadi doono tallaabooyin milatari oo dheeraad ah haddii Iiraan ay sii waddo weerarrada ay ku hayso maraakiibta ganacsiga iyo danaha Maraykanka ee gobolka.
Weerarradan ayaa sare u qaaday walaaca laga qabo in xaaladdu isu beddesho dagaal ballaaran oo gobolka ku fida, iyadoo khatar la gelinayo amniga marin-biyoodka Hormuz oo ah halbowlaha ugu muhiimsan ee dhoofinta shidaalka caalamka.
