Xildibaanada mucaaradka ee ku mideysan Golaha Samatabixinta Qaranka Soomaaliyeed ayaa war-saxaafadeed ay maanta soo saareen ku muujiyay walaac xooggan oo ay ka qabaan xaaladda siyaasadeed ee dalka, iyagoo si gaar ah farta ugu fiiqay hubanti la’aanta siyaasadeed, kala fogaanshaha dowladda federaalka iyo dowlad goboleedyada, gaar ahaan Jubbaland iyo Puntland, iyo sidoo kale hub sharci darro ah oo dalka kusoo qulqulaya.
Xildhibaannada Golaha Samatabixinta ayaa si adag u dhaleeceeyay sida ay wax u wadaan madaxda dowladda talada haysa, waxayna si gaar ah u sheegeen in loo baahan yahay in “gacanta laga qabto xukuumadda Xasan Sheekh” si loo badbaadiyo mustaqbalka dalka iyo rajadii shacabka Soomaaliyeed.
Waxay xuseen in kulamadii u dhexeeyay Madaxweynaha iyo mucaaradka muddo laba bilood socday aysan wax natiijo ah keenin, taas oo muujinaysa xaalad halis ah oo dalka gelin karta jahwareer siyaasadeed iyo niyad-jab bulsho.
Goluhu wuxuu ugu baaqay bulshada caalamka in ay si degdeg ah uga falceliyaan xaaladda Soomaaliya, isla markaana ay garab istaagaan dadaallada lagu xasilinayo siyaasadda iyo dhismaha dowladnimo dhab ah oo loo dhan yahay.
