Qaar ka mid ah Xildhibaanada mucaaradka ee ka tirsan Golaha Samata-bixinta Qaranka Soomaaliyeed ayaa maanta war-saxaafadeed ka soo saaray xirnaanshaha kalfadhiga 7-aad ee Baarlamaanka Federaalka Soomaaliya.
Xildhibaanada ayaa sheegay in ay waajib dastuuri ah tahay in kalfadhiga Golaha Shacabka si dhaqso leh loo furo, iyaga oo xusay in jadwalkii hore ee furitaanka kalfadhiga uu ku beegnaa 22-kii bishii August 2025, balse uu dib u dhacay sababo siyaasadeed.
War-saxaafadeedka ay soo saareen ayaa lagu sheegay in dib-u-dhacyada joogtada ah ee ku yimid howlaha Baarlamaanka ay sabab u tahay fashilka Guddoonka Golaha Shacabka, isla markaana ay wiiqeen shaqadii dastuuriga ahayd ee xildhibaanada.
Xildhibaanada mucaaradka ayaa ku baaqay in si degdeg ah loo furo kalfadhiga 7-aad, si Baarlamaanka u guto waajibaadkiisa ku aaddan sharci-dejinta, kormeerka iyo xil gudashada shacabka Soomaaliyeed ay ka sugayaan.
Xildhibaanada ku mideysan Golaha Samata-bixinta ayaa sidoo kale ku eedeeyay hoggaanka Baarlamaanka iyo madaxda dowladda in ay si ula kac ah dib u dhigeen kalfadhiga, taas oo ay ku sheegeen inay qayb ka tahay siyaasadda xayiraadda iyo loollanka gudaha.
