Magaalada Kismaayo ayaa waxaa buux dhaafiyay madax iyo mas’uuliyiin kala duwan, kuwaas oo ka qeyb galaya shir muhiim ah oo halkaas ka furmaya
Sidoo kale, Madaxweynaha Puntland, Siciid Cabdullaahi Deni, iyo Ra’iisul Wasaarihii hore ee dalka, Xasan Cali Khayre, ayaa iyaguna gaaray magaalada Kismaayo, halkaas oo si diirran loogu soo dhaweeyay, waxaana soo dhawayntooda hoggaaminayay Madaxweynaha Jubbaland, Mudane Axmed Maxamed Islaam (Axmed Madoobe), iyo mas’uuliyiin kale.
Waxaa siidoo kale magaalada Kismaayo gaaray in Ra’iisul Wasaarihii hore Maxamed Xuseen Rooble iyo Xildhibaan Cabdiraxmaan Cabdishakuur Warsame.
Sidoo kale wafdi uu hoggaaminayo Ra’iisul Wasaarihii hore ee Soomaaliya, Cabdi Faarax Shirdoon (Saacid) ayaa isna tagay magaalada Kismaayo.
Madaxweynihii 7-aad ee Jamhuuriyadda Federaalka Soomaaliya, Shariif Sheekh Axmed, ayaa isna la filayaa inuu berri gaaro magaalada Kismaayo.
Waxaa lagu wadaa in magaalada Kismaayo uu ka furmo shir soconaya muddo saddex cisho ah, kaas oo diiradda lagu saari doono xaaladda kala-guurka siyaasadeed ee dalka, xilli ay Dowladda Federaalka Soomaaliya waddo qorshayaal ku aaddan hirgelinta doorashooyin toos ah, kuwaas oo ay si cad uga soo horjeedaan dhinacyada shirka isugu imanaya.
Sidoo kale, shirka waxaa si gaar ah diiradda loogu saari doonaa doorashada hoggaanka Golaha Mustaqbalka Soomaaliya, oo ay ku mideysan yihiin maamulada Jubbaland, Puntland, iyo Madasha Samatabixinta Qaranka.
