Shirka Golaha Mustaqbalka Soomaaliyeed ayaa maanta waxaa uu ka furmayaa Magaalada Kismaayo ee Gobolka Jubbada Hoose.
Madaxweynihii hore ee Soomaaliya Sheekh Shariif Sheekh Axmed ayaa maanta la filayaa inuu gaaro Magaalada Kismaayo.
Ammaanka magaalada Kismaayo ayaa saaka aad loo adkeeyay, iyadoo wadooyinka lagu daadiyay ciidamada ammaanka.
Magaalada Kismaayo ayaa waxaa buux dhaafiyay madax iyo mas’uuliyiin kala duwan, kuwaas oo ka qeyb galaya shir muhiim ah oo halkaas ka furmaya
Waxaa lagu wadaa in magaalada Kismaayo uu ka furmo shir soconaya muddo saddex cisho ah, kaas oo diiradda lagu saari doono xaaladda kala-guurka siyaasadeed ee dalka, xilli ay Dowladda Federaalka Soomaaliya waddo qorshayaal ku aaddan hirgelinta doorashooyin toos ah, kuwaas oo ay si cad uga soo horjeedaan dhinacyada shirka isugu imanaya.
Sidoo kale, shirka waxaa si gaar ah diiradda loogu saari doonaa doorashada hoggaanka Golaha Mustaqbalka Soomaaliya, oo ay ku mideysan yihiin maamulada Jubbaland, Puntland, iyo Madasha Samatabixinta Qaranka.
