Madaxweynaha Soomaaliya, Xasan Sheekh Maxamuud, ayaa qorsheynaya inuu ka qayb galo munaasabad caalami ah oo lagu soo beegay dabaaldegga 90-guurada Ciidamada Cirka Itoobiya, kaasoo lagu qaban doono dalka Itoobiya laga bilaabo 23 ilaa 27 Jannaayo 2026.
Xafladan ballaaran ee Black Lion Air Show ayaa lagu soo bandhigi doonaa diyaaradaha dagaalka ee ciidamada cirka Itoobiya, waxaana sidoo kale ka qayb geli doona wakiillo ka socda dalal kala duwan, oo ay ka mid yihiin Ruushka, Imaaraadka, Marooko, iyo Czech Republic.
Munaasabaddan ayaa ah mid muhiim ah oo lagu muujinayo awoodda milatari ee ciidamadan cirka ah, waxaana sidoo kale la filayaa in lagu soo bandhigo diyaaradaha ugu casrisan ee dagaalka, iyada oo lagu tixgelinayo horumarka ciidanka cirka ee dalalka ka qayb galaya.
Madaxweyne Xasan Sheekh ayaa kulan waxaa uu la qaadan doonaa R/wasaaraha Itoobiya Abiy Ahmed waxaa uuna kala hadli doonaa xiriirka labada dalka, arrimaha ammaanka, dagaalka Argagixisada iyo arrimaha Gobolka geeska Afrika.
Madaxweynaha Soomaaliya Xasan Sheekh Maxamuud ayaa sidoo kale qorsheynaya inuu 25-ka Jannaayo 2026 safar ku tago dalka Maraykanka, gaar ahaan magaalada New York, halkaas oo uu shir guddoomin doono kulanka Golaha Ammaanka ee Qaramada Midoobay (UNSC). Kulankaas ayaa muhiim u ah siyaasadda iyo ammaanka caalamiga ah, iyadoo Soomaaliya ay ka mid tahay dalalka muhiimka ah ee ka qayb qaata arrimaha amniga ee gobolka iyo caalamka.
Safarka Madaxweynaha ee Maraykanka iyo ka qaybgalka kulanka UNSC ayaa noqon doona fursad muhiim ah oo Soomaaliya ay ku muujin karto doorkeeda muhiimka ah ee amniga caalamiga ah, iyo sidoo kale inay ka wada hadlaan arrimaha amniga ee gobolka Geeska Afrika, gaar ahaan Soomaaliya oo wajahaysa caqabado amni iyo siyaasadeed.
Madaxweynaha ayaa sidoo kale ku dhiirigelin doona xubnaha UNSC inay gacan ka geystaan xalinta khilaafaadka gudaha ee Soomaaliya iyo sidii loo taageeri lahaa dadaallada amni iyo dib u dhiska dalka.
