Wargeyska The Middle East Eye ayaa waxaa uu si rasmi ah u qiray in Turkigu maalintii Arbacadii magaalada Muqdisho uu ka dejiyey diyaaraddaha ay dawladda Maraykanku soo saarto ee F-16 oo ka mid ah diyaaraddaha ugu horumarsan dunida wakhti xaadirkan.
Warbixintu waxay tibaaxaysa in Turkigu muddoba shaqo ka wadey gudaha garoonka Muqdisho oo la diyaariyey Bakhaatadadii diyaaradaha la dhigu lahaa, qalabkii dayactirka iyada oo sidoo kale ay joogaan khubradii kale ee ka hawl geli lahayd.
Keenista diyaaradaha ayaa la sheegay inuu si gaar ah ula xiriirto qorshayaasha qodista shidaalka badda oo la filayo inay billowdaan dabayaaqada sannadkan, iyo sidoo kale hindise lagu dhisayo saldhig dayax-gacmeed oo laga hirgelinayo waqooyiga Muqdisho.
Tallaabadan ayaa muujinaysa xoojinta iskaashiga istiraatiijiga ah ee u dhexeeya Turkiga iyo Soomaaliya, gaar ahaan dhinacyada ammaanka, tamarta iyo tiknoolajiyadda, iyadoo Ankara ay sii kordhinayso joogitaankeeda gobolka.
Dhanka Wargeys ka soo baxay Gariiga ayaa isna qoray inuu Turkiga Soomaaliya keeni doono hubka difaaca cirka ee lidka diyaaradaha dagaalka.
Qorshuhu waa in uu Turkigu difaacdo danihiisa Soomaaliya oo uu meesha ka saaro cid kasta oo caqabad ku noqon karta.
Waa isla tallaabadii uu ka sameeyey dalka Liibiya ka hor intii aanu weerarin saldhigyadii Khaliif Xaftar oo 2019-kii kaabiga u saarnaa in uu la wareego dalka Liibiya si gaar ah magaalada Tiriboli ama sida ay Carabtu ugu dhawaaaqdo Daraabulus.
