Ciidanka Ciidanka Xoogga Dalka Soomaaliyeed oo garab ka helaya ciidamada deegaanka ee Macawiisleyda ayaa fiidnimadii caawa hawlgal qorsheysan ka fuliyey inta u dhexeysa deegaannada Yasooman iyo Moqokori ee gobolka Hiiraan, kadib markii la helay xog sirdoon oo muujinaysay dhaqdhaqaaqyo maleeshiyaad ka tirsan Al-Shabaab.
Hawlgalka ayaa lagu beegsaday koox maleeshiyaad ah oo isku dayeysay inay dhibaato u geysato shacabka iyo gaadiidka maraya waddooyinka deegaanka.
Sida ay sheegeen saraakiil amni, ciidamada ayaa gubay gaari ay maleeshiyaadku adeegsanayeen, waxaana halkaasi lagu dilay afar xubnood oo ka tirsanaa kooxda.
Saraakiisha ciidamada iyo dadka deegaanka ayaa sheegay in maleeshiyaadka Al-Shabaab ay si joogto ah ugu kala gudbaan dhulka miyiga ah iyo tuulooyinka ku teedsan waddooyinka isku xira Yasooman, Moqokori iyo deegaanada kale ee gobolka Hiiraan.
Saraakiisha milatariga ayaa sheegay in hawlgalladan ay qayb ka yihiin dadaallada lagu sugayo amniga, laguna joojinayo weerarrada ay maleeshiyaadku ku qaadaan dadka safarka ah iyo gaadiidka ganacsiga.
Howlgalkan ayaa kusoo beegmaya xilli ciidamada dowladda iyo kuwa deegaanka ay kordhiyeen cadaadiska ka dhanka ah maleeshiyaadka Al-Shabaab, si loo xaqiijiyo amniga guud ee gobolka Hiiraan iyo deegaanada ku dhow.
