Waxaa maanta oo Khamiis ah la filayaa in shir siyaasadeed oo muhiim ah uu si rasmi ah uga furmo xarunta Madaxtooyada Qaranka ee Villa Soomaaliya, kaas oo u dhexeeya Dowladda Federaalka Soomaaliya iyo Golaha Mustaqbalka Soomaaliya.
Kulanka oo la qorsheeyay inuu bilowdo 11:00 subaxnimo ayaa lagu furayaa hab-maamuus uu hoggaaminayo Madaxweynaha Jamhuuriyadda Federaalka Soomaaliya, Xasan Sheekh Maxamuud. Madaxweynaha ayaa la filayaa inuu soo bandhigo qiimeyn guud oo ku saabsan xaaladda dalka iyo jihada geeddi-socodka siyaasadeed.
Wararka hordhaca ah ayaa sheegaya in kulanka la ballaarin doono, iyadoo xubno ka socda bulshada rayidka lagu wado inay ka qeyb galaan si loo helo aragtiyo ka tarjumaya baahiyaha bulshada.
Dhinacyada ayaa muujiyay diyaar garow tanaasul iyo niyad-sami, si kulankan uu u horseedo isfahan siyaasadeed iyo xal waara.
Kulankan ayaa loo arkaa mid go’aamin kara jihada siyaasadeed ee Soomaaliya bilaha soo socda, iyadoo laga sugayo warmurtiyeed rasmi ah oo caddeynaya qodobada la isku afgartay iyo tallaabooyinka xiga ee lagu xoojinayo wada-shaqeynta siyaasadeed iyo xasilloonida dalka.
