Golaha Mustaqbalka oo ay wehliyaan waxgaradka iyo qeybaha kala duwan ee bulshada caasimadda ayaa maanta magaalada Muqdisho ku qabanaya kulan ballaaran oo cinwaankiisu yahay “Difaaca Dastuurka”.
Shirkan ayaa looga soo horjeedaa wax-ka-beddel lagu sameeyo dastuurka iyo muddo kororsi ay sameystaan hay’adaha Dowladda Federaalka Soomaaliya iyo dowlad-goboleedyada.
Shirweynaha oo lagu qabanayo xarunta Hotel Jazeera ayaa la filayaa in diiradda lagu saaro ilaalinta, hirgelinta iyo dhowrista dastuurka dalka, xilli doodaha siyaasadeed ay sii xoogeysanayaan.
Waxaa ka qeyb geli doona hoggaanka Golaha Mustaqbalka Soomaaliyeed, waxgarad, aqoonyahanno iyo wakiillo ka socda bulshada rayidka, kuwaas oo lagu wado inay soo bandhigaan aragtiyo iyo talooyin ku saabsan jihada siyaasadeed ee dalka.
Shirkan ayaa kusoo beegmaya iyadoo ay sii kordhayaan walaacyada ku saabsan isbeddelka dastuurka iyo mustaqbalka nidaamka dowladnimo ee Soomaaliya.
