Ciidamada xoogga ayaa maanta gudaha u galay deegaanka Xawaadleey ee gobolka Shabeellaha dhexe, iyagoo dagaal kula wareegay deegaankaasi.
Ciidanka ayaa maalmihii ugu dambeeyay go’doomin ku haayay deegaanka tan iyo markii ay gacanta ku dhigeen deegaanka Jabad Gudane.
Wasaaradda Gaashaandhigga Soomaaliya ayaa warsaxaafadeed ay soo saartay ku sheegtay wasaaradu waxay si weyn u ammaaneysaa guusha weyn ee ay ciidamada Xoogga Dalka Soomaaliyeed (CXDS) ka gaareen hawlgalka ka socda gobolka Shabeellaha Dhexe, gaar ahaan deegaanka Xawaadley. Ciidamadu waxay si guul leh u xoreeyeen deegaankaasi oo horey ay uga dhuumaalaysnaayeen maleeshiyaadka Khawaarijta ee Al-Shabaab.
Hawlgalka Xawaadley ayaa qayb ka ah Hawlgalka Badar ee bisha barakaysan ee Ramadaan, kaas oo ujeedkiisu yahay in la burburiyo xarumaha iyo fariisimaha Khawaarijta ee ku yaalla deegaanada ay ka taliyaan.
Ciidamada Xoogga Dalka Soomaaliyeed ayaa sidoo kale go’doomiyay deegaanka tan iyo markii ay gacanta ku dhigeen deegaanka Jabad Gudane, iyagoo dhowr maalmood ka dib xaqiijiyay in deegaanka Xawaadley uu si buuxda uga baxay gacanta Al-Shabaab.
Wasaaradda Gaashaandhigga iyo Taliska Ciidanka Xoogga Dalka waxay mar kale cadeynayaan in hawlgallada ka dhanka ah Khawaarijta la sii xoojin doono.
