Ra’iisul Wasaaraha Itoobiya Abiy Ahmed ayaa si cad u beeniyay eedeymo la xiriira in dalkiisu faragelin ku hayo arrimaha gudaha ee Soomaaliya, isagoo ku adkeystay in Itoobiya ay deriskeeda kula nooshahay nabad, ixtiraam iyo iskaashi.
Abiy Ahmed oo wareysi siiyay warbaahinta gudaha Ethiopia ayaa sheegay in xiriirka kala dhexeeya Somalia uu ku saleysan yahay iskaashi dhinacyada amniga iyo horumarinta, isla markaana aysan jirin kooxo ama dhinacyo gaar ah oo ay taageerto Itoobiya.
Ra’iisul Wasaaruhu wuxuu xusay in Soomaalidu ay yihiin bulshada labaad ee ugu tirada badan ee ku nool Itoobiya, arrintaas oo uu tilmaamay inay muujinayso xiriirka dhow iyo is-ixtiraamka u dhexeeya labada shacab.
Dhanka kale, Abiy Ahmed ayaa sidoo kale ka hadlay xiriirka dalkiisa la leeyahay Eritrea, isagoo sheegay inuu ku dhisan yahay nabad, walaalnimo iyo deris-wanaag, isla markaana Itoobiya ay ka go’an tahay xoojinta xasilloonida guud ee gobolka Geeska Afrika.
Ra’iisul Wasaaraha Itoobiya ayaa mar kale carrabka ku adkeeyay in dowladdiisu aysan wax faragelin ah ku hayn dalalka gobolka, balse ay diiradda saareyso xoojinta iskaashiga iyo ilaalinta nabadda.
