Maxkamadda Sare ee Soomaaliya ayaa maanta si rasmi ah u ansixisay natiijada doorashooyinkii golayaasha deegaanka ee gobolka Banaadir, kuwaas oo horay si ku meel gaar ah ugu dhawaaqay Guddiga Doorashooyinka Qaranka.
Go’aanka maxkamadda ayaa yimid kadib markii la dhageystay dacwad ku saabsan sharciyadda iyo habraaca doorashadii ka dhacday Muqdisho 25 December 2025, taas oo dhalisay muran siyaasadeed iyo dhaliilo ka imaanayay mucaaradka.
Maxkamadda ayaa sheegtay in:
Dacwadda loo gudbiyay ay waafaqsanayd habraaca sharciga.
Natiijada doorashada ay tahay mid sax ah oo la ansixin karo.
Guddiga doorashooyinka uu si sharci ah ugu dhawaaqay natiijada.
Sidoo kale, maxkamaddu waxay faray hay’adaha ku shaqada leh inay si buuxda u dhaqan geliyaan go’aanka, iyadoo xustay in go’aankan yahay mid kama dambeys ah oo aan racfaan kale laga qaadan karin.
Doorashadan ayaa horay u wajahday qaadacaad iyo eedeymo ka yimid mucaaradka, kuwaas oo ku dooday in aysan jirin hannaan hufan oo lagu qabtay doorashada.
Go’aanka maanta kasoo baxay Maxkamadda Sare ayaa la filayaa inuu saameyn weyn ku yeesho xaaladda siyaasadeed ee Muqdisho iyo guud ahaan dalka.
