Ciidanka gaarka ah ee Kumaandooska Danab ee Xoogga Dalka Soomaaliya ayaa howlgal qorsheysan ka fuliyay degaanka Far-Shabeel oo hoos taga degmada Jilib ee gobolka Jubbada Dhexe.
Howlgalkan oo si taxaddar leh loo abaabulay ayaa lagu beegsaday maleeshiyaad ka tirsan kooxda Al‑Shabaab, iyadoo ciidamadu ay ku guuleysteen inay burburiyaan fariisimo ay kooxdaasi ku lahayd deegaankaas.
Saraakiisha ammaanka ayaa sheegay in howlgalka uu qeyb ka yahay dadaallada joogtada ah ee lagu wiiqayo awoodda Al-Shabaab, gaar ahaan deegaanada ay weli ku dhuumaaleysanayaan ee gobolka Jubbada Dhexe.
Degmada Jilib ayaa muddooyinkii u dambeeyay martigelisay howlgallo iyo duqeymo isdaba joog ah oo lagu bartilmaameedsanayo horjoogayaasha iyo maleeshiyaadka kooxda, iyadoo lagu tilmaamo mid ka mid ah saldhigyada ugu muhiimsan ee Al-Shabaab.
Dowladda Soomaaliya ayaa horey u shaacisay in howlgal gaar ah oo ka dhacay Jilib 10-kii Diseembar 2025 lagu dilay Cabdullaahi Cismaan, oo loo yaqaanay “Injineer Ismaaciil”, kaasi oo ahaa madaxii qaybta qaraxyada ee Al-Shabaab, isla markaana door weyn ku lahaa weerarro badan oo qaraxyo ah.
