Ciidamada Badda ee Soomaaliya iyo kuwa dalka Turkiga ayaa si wadajir ah u sameeyay dhoolatus milatari oo ka dhacay Badda Soomaaliya, kaas oo muujinaya xoojinta iskaashiga amni ee labada dal.
Sida ay shaacisay Wasaaradda Gaashaandhigga Turkiga, dhoolatuskan ayaa lagu adeegsaday maraakiib dagaal oo ay ka mid yihiin Korkut, Altan iyo Sancar, kuwaas oo qeyb ka ah awoodda badda ee Turkiga.
Ujeeddada dhoolatuskan ayaa lagu sheegay kor u qaadista xirfadaha ciidanka, is-dhexgalka howlgalada badda, iyo xoojinta wada shaqeynta dhinaca amniga badda, gaar ahaan la dagaallanka khataraha ka jira xeebaha Soomaaliya.
Dhoolatuskan ayaa sidoo kale imaanaya xilli ay sii xoogeysanayaan xiriirka milatari iyo iskaashiga amni ee u dhexeeya Soomaaliya iyo Turkiga, iyadoo Turkiga uu ka mid yahay dalalka sida weyn u taageera dib u dhiska ciidamada qalabka sida ee Soomaaliya.
