Maamulka Hirshabelle ayaa war rasmi ah ka soo saaray dagaal beeleed ka socda degmada Jalalaqsi ee Gobolka Hiiraan, kaas oo u dhexeeya beelo walaalo ah oo wada dega deegaankaasi.
Qoraal ka soo baxay Dowladda Hirshabelle ayaa lagu sheegay in si degdeg ah oo shuruud la’aan ah loo joojiyo colaadda, iyadoo la xusay in dagaalladu sababeen dhimasho, dhaawac, burbur hantiyeed iyo barakac soo gaaray shacabka.
Hirshabelle ayaa ugu baaqday odayaasha dhaqanka, culumaa’udiinka iyo waxgaradka labada dhinac inay door muuqda ka qaataan qaboojinta xiisadda iyo dadaallada nabadeed ee lagu soo afjarayo colaadda.
Maamulka ayaa sidoo kale muujiyay sida uu uga xun yahay dhibaatada bani’aadamnimo ee ka dhalatay dagaalka, wuxuuna tacsi u diray ehellada dadka ku geeriyooday rabshadaha, halka uu caafimaad degdeg ah u rajeeyay dadka ku dhaawacmay.
