Madaxweyne Donald Trump ayaa la filayaa inuu toddobaadkan Madaxweynaha Turkiga Recep Tayyip Erdogan ku wargeliyo in Ankara dib loogu furayo waddadii ay ku heli lahayd diyaaradaha dagaalka Mareykanka ee F-35, xilli uu Trump booqasho ku joogo Turkiga oo martigelinaya shir madaxeedka NATO.
Warbixin ay baahisay warbaahinta Mareykanka ayaa sheegtay in tallaabadan ay imaneyso saacado kaddib markii Ra’iisul Wasaaraha Israa’iil Benjamin Netanyahu uu si cad u muujiyay walaaciisa ku aaddan in Turkiga laga iibiyo diyaaradaha F-35, maadaama arrintaasi ay wax ka beddeli karto dheellitirka awoodda cirka ee gobolka.
Sida lagu sheegay warbixinta, Trump ayaa lagu wadaa inuu Erdogan u sheego in uu diyaar u yahay in Turkiga dib loogu soo celiyo barnaamijka diyaaradaha F-35, inkastoo weli ay taagan yihiin caqabado sharci iyo siyaasadeed oo ka dhashay go’aankii Mareykanka ee 2019 ku saaray Turkiga barnaamijkaas, kadib markii Ankara ay iibsatay nidaamka difaaca gantaallada ee Ruushka ee S-400.
Xilligaas Mareykanku wuxuu ku dooday in joogitaanka S-400 uu halis gelin karo sirta iyo tiknoolajiyada F-35.
Trump ayaa hore u muujiyay inuu doonayo inuu wax weyn siiyo Erdogan inta uu ku sugan yahay Turkiga.
Warbixino dheeraad ah ayaa sheegaya in arrintaasi aysan ku koobnaan karin oo kaliya dib u furista F-35, balse ay suuragal tahay in Ankara loo oggolaado helitaanka matoorada diyaaradaha dagaalka, si loo dedejiyo mashruuca Turkiga ee KAAN, oo ah diyaaradda jiilka shanaad ee uu dalku doonayo inuu si madax-bannaan u soo saaro.
Tallaabadaasi haddii ay hirgasho waxay Turkiga siin kartaa awood cusub oo militari iyo madax-bannaani dhinaca warshadaha difaaca ah.
Arrintan ayaa kusoo beegmaysa iyadoo Ankara ay martigelinayso shir madaxeedka NATO, halkaas oo Turkigu doonayo inuu ka faa’iideysto xiriirka diirran ee Erdogan iyo Trump si uu u xoojiyo booskiisa istiraatiijiga ah, uga qaado cunaqabateyntii la xiriirtay S-400, isla markaana dib ugu helo marin uu ku galo heshiisyada ugu waaweyn ee hubka reer Galbeedka.
Reuters ayaa sidoo kale sheegtay in Turkigu kulamada Ankara ka rajeynayo horumar la taaban karo oo ku saabsan helitaanka F-35 iyo ballaarinta iskaashiga difaaca ee uu la leeyahay Washington.
