Wakaaladda wararka ee AFP ayaa warbixin ay ka qortay Soomaaliya ku sheegtay in Turkigu, kaddib maalgelin iyo iskaashi ballaaran oo uu dalka ka sameeyay, uu hadda wajahayo khatar ah inuu si toos ah ugu dhex milmo khilaafaadka siyaasadeed iyo dagaallada gudaha Soomaaliya.
AFP waxay sheegtay in diyaaradaha dagaalka ee Turkiga ee F-16 ay Isniintii gantaallo ka rideen agagaarka magaalada Baydhabo, iyagoo taageerayay ciidamada dowladda Federaalka Soomaaliya xilli ay iska caabinayeen weerar ay qaadeen ciidamo taabacsan madaxweynihii hore ee Koonfur Galbeed, Cabdicasiis Xasan Maxamed Laftagareen.
Warbixintu sidoo kale waxay xustay eedeymo loo jeediyay Turkiga oo la xiriira dhacdadii 3-dii September ee Doolow, halkaas oo lagu dhaawacay Jeneraal Mahad Cabdiraxmaan. Dowladda Soomaaliya ayaa markaas sheegtay in dhaawaciisu ka dhashay walxo qarxa oo lagu diyaarinayay gudaha guriga, halka dhinacyo kale ay ku eedeeyeen weerar cirka ah.
Dhacdada Doolow waxay dhalisay bannaanbaxyo naadir ah oo looga soo horjeeday Turkiga, iyadoo qaar ka mid ah dibadbaxayaasha ay gubeen calanka Turkiga, waxaana sidoo kale la weeraray sawirrada Madaxweynaha Turkiga Recep Tayyip Erdogan. AFP waxay soo xigatay masuul deegaanka Afmadow oo si adag u dhaliilay doorka Turkiga.
AFP waxay tilmaantay in Turkigu uu Soomaaliya ka sameeyay maalgashi siyaasadeed, dhaqaale iyo ciidan oo aad u ballaaran. Turkigu wuxuu leeyahay saldhigga ugu weyn ee tababarka ciidamadiisa ee dibadda, isagoo sidoo kale Soomaaliya ka dhisaya xarun hawada sare ah oo ku taalla Warsheekh, isla markaana baaraya fursadaha shidaalka.
Turkigu wuxuu tababaray ciidamada Soomaaliya, wuxuuna bixiyay gargaar xilliyadii abaaraha, fatahaadaha iyo macluusha. Shirkado Turkish ah ayaa sidoo kale maamula garoonka diyaaradaha iyo dekedda Muqdisho.
Sidoo kale, Turkiga ayaa Soomaaliya geeyay diyaaradaha dagaalka ee F-16. Wasaaradda Difaaca Turkiga waxay bishii April si rasmi ah u xaqiijisay joogitaanka saddex F-16 oo Soomaaliya ku sugan.
AFP waxay sheegtay in xisbiyada iyo kooxaha mucaaradka Soomaaliya ay walaac ka muujiyeen in hubka, gaadiidka iyo diyaaradaha aan duuliyaha lahayn ee Turkigu Soomaaliya siiyay, kuwaas oo loogu talagalay dagaalka maleeshiyaadka Al-Shabaab, loo adeegsado khilaafaadka siyaasadeed iyo dagaallada u dhexeeya dhinacyada Soomaalida.
Mucaaradka ayaa sidoo kale Turkiga kala hadlay in uusan dhinac ka raacin khilaafka siyaasadeed ee Soomaaliya.
Mas’uul sare oo Turkish ah oo AFP la hadlay ayaa sheegay in Ankara ay Soomaaliya u joogto muddo dheer, isla markaana xiriir ay la soo sameysay dhammaan madaxweynayaashii Soomaaliya ee kala dambeeyay.
Mas’uulka ayaa sheegay in taageerada Turkiga loogu talagalay shacabka iyo dowladda Soomaaliya, balse aysan ahayn taageero loo fidinayo siyaasad ama koox gaar ah.
Diblomaasi reer Galbeed ah oo Muqdisho jooga ayaa isna AFP u sheegay in Turkigu yahay dal si xeel dheer uga shaqeeya ilaalinta danihiisa, isla markaana uu taageeri doono cidda uu u arko inay danahaas ilaalin karto.
Dowladda Soomaaliya ayaa dhankeeda ku tilmaantay eedeymaha mucaaradka kuwo ah “warar marin-habaabin ah”, iyadoo mas’uuliyiin ka tirsan dowladda ay si cad u difaaceen xiriirka dhow ee Soomaaliya iyo Turkiga.
Si kastaba, AFP waxay xustay in qayb ka mid ah shacabka Soomaaliyeed ay hadda walaac ka qabaan doorka Turkiga, iyadoo qaar ay aaminsan yihiin in taageerada Ankara ee dowladda Federaalka ay sii xoojinayso kala qeybsanaanta siyaasadeed.
AFP waxay warbixinteeda ku soo gabagabeysay in Turkigu Soomaaliya ka sameeyay maalgashi muddo dheer ah, balse ballaarinta doorkiisa ciidan iyo siyaasadeed ay hadda Ankara gelinayso xaalad adag oo u dhexeysa iskaashi dowladeed iyo khilaafaad siyaasadeed oo gudaha Soomaaliya ah.
