Wararka ka imaanaya gobolka Hiiraan ayaa sheegaya in maleeshiyaadka Al-shabaab ay weerar ku bilowday qaraxyo ismiidaamin ah ay ku qaadeen deegaano hoostaga degmada Buula Burde ee gobolka Hiiraan oo halkaasi saldhigyo ay ku leeyihiin ciidamada xoogga iyo dadka deegaanka.
Dagaalka ayaa waxaa uu si gaar ah ugu socdaa deegaanka Cadow Gurey oo u dhexeeya deegaanka Aborey iyo degmada Buula Buula Burde ee gobolka Hiiraan.
Goobjoogayaal ayaa sheegaya in dhinacyada ay isku adeegsanayaan hubka noocyadiisa kala duwan, iydoona dhawaqa rasaasta laga maqlayo deegaanada la dul dagaalamayo.
Wararka ayaa sheegaya in qof isku soo xiray waxyaabaha qarxa uu isku qarxay saldhig ay ciidamada dowladda Soomaaliya iyo kuwa dadka deegaanka ay ku leeyihiin deegaanka Cadow Gurey.
Deegaanka Cadow Gurey ayaa waxaa shalay tagay Taliyaha Hayโadda Nabad sugida iyo SIrdoonka Qaranka Cabdullaahi Sanbaloolshe iyo Madaxweyne ku xigeenka Hirshabelle Yuusuf Daba geed iyo Musharax Liibaan Shuluq, halkaasina waxaa ay ka wadeen guluf dagaal oo dhan ah maleeshiyaadka Al-shabaab.
Ma cadda Khasaaraha rasmiga ah ee ka dhashay dagaalka xiligan ka socda deegaanka.
Dhanka kale diyaarado dagaal ayaa saaka duqeymo ku garaacaya saldhigyo ay maleeshiyaadka Al-shabaab ay ku leeyihiin deegaanka Daaru nimca ee gobolka shabeelada Dhexe.
Juqda duqeymaha ayaa laga maqlay deegaanka waxaana la bartilmaameedsanayaa maleeshiyaadka ka tirsan Al-shabaab oo halkaasi fariisamo ka sameystay.
Duqeyntan ayaa ku soo aaadaysa xili shalay, duleedka degmada Daaru Nimca ay weerar ku qaadeen maleeshiyaadka Al-shabaab.
Deegaanada Hirshabelle ayaa waxaa ka socda guluf dagaal oo ka dhan ah maleeshiyaadka Al-shabaab, waxaana qeybo ka mid ah ku sugan madaxweynaha Maamulka Hirshabelle Cali Guudlaawe, waxaa uuna halkaasi ka wadaan guluf dagaal oo xooggan.
