Guddoomiyaha Xisbiga Nagaad, ahna Musharrax Madaxweyne, Mudane Cabdi Faarax Shirdoon (Saacid), ayaa Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, iyo Ra’iisul Wasaaraha Xukuumadda Federaalka Soomaaliya, Mudane Xamse Cabdi Barre, ugu soo jeediyey qodobo muhiim ah oo ku saabsan xaaladda amniga iyo siyaasadda dalka.
Qodobadaasi ayaa waxaa ka mid ah:
- Wadatashi iyo Furdaamin Arrimaha Amniga iyo Siyaasadda: Mudane Saacid wuxuu soo jeediyey in arrimaha cakiran ee amniga iyo siyaasadda dalka loo furdaamiyo si wadatashi ku dhisan, si loo helo xal waara oo loo wada dhan yahay.
- Doorashooyinka iyo Dastuurka: Mudane Saacid ayaa tilmaamay in arrimaha doorashooyinka iyo wax ka beddelka dastuurka ay muhiim tahay in lagu saleeyo wadar ogol, si loo gaaro go’aan mideysan oo lagu qiimeeyo maslaxadda guud ee dalka.
- Dib-u-habeyn iyo Dhiirrigelinta Ciidamada Qaranka: Waxa uu sidoo kale ugu baaqay in ummadda Soomaaliyeed ay u midoobaan ciribtirka argagixisada, iyadoo loo sameeyo dib-u-habeyn ballaaran iyo dhiirrigelin joogto ah ciidamada Qaranka Soomaaliyeed si ay uga hortagaan khataraha amni ee dalka ka jira.
