Wasiirka Maaliyadda Soomaaliya Mudane Biixi Imaan Cige ayaa maanta shir-guddoomiyay kulanka billaha ah ee guddiga maamul-wanaagga Maaliyadda ee magaciisa loo soo gaabiyo #FGC, oo ay ku mideysan yihiin Dowladda Federaalka iyo Hey’adaha Dhaqaalaha Adduunka ee wada-shaqeynta la leh Dowladda.
Kulanka ayaa intii uu socday waxaa diiradda lagu saaray horumarka iyo sare u qaadidda dakhliga gudaha, xoojinta nidaamka Maamul-Wanaagga Maaliyadda, casriyeynta hannaanka iibka qaranka iyo xoojinta hufnaanta Maamulka Maaliyadda oo dhammantoodba la isla gartay in ay u socdaan habkii ugu wanaagsanaa iyo dhabbihii guusha.
Wasiirka Maaliyadda DFS Md Biixi Imaan Cige oo ah guddoomiyaha guddiga Maalul-Wanaagga Maaliyadda ayaa sheegay in Dowladdu ay ka go’an tahay ku dhaqmidda nidaam ay ku dheehan tahay daah-furnaan iyada oo la raacayo habka Maamulka Guud ee Maaliyadda dalka.
Wasiirka ayaa sidoo kale tilmaamay hannaanka isla xisaabtan ka iyo dowlad-Wanaaga in uu qeyb ka yahay kobcinta dhaqaalaha Soomaaliya, isagoona xusay in horumar weyn laga gaaray kobcinta dhaqaalaha muddooyinkii ugu dambeeyay.
