Madaxweynihii hore ee Soomaaliya, Mohamed Cabdullaahi Farmaajo, ayaa shacabka Soomaaliyeed ugu hambalyeeyay munaasabadda weyn ee 65-guurada kasoo wareegtay maalinta xorriyadda, midnimada iyo dowladnimada Soomaaliyeed oo ku beegan 1-da Luulyo.
Madaxweynuhu wuxuu sheegay in toddobaadka xorriyaddu uu xambaarsan yahay xusuus iyo qiime weyn, maadaama uu ka dhashay halgan dheer oo ay shacabka Soomaaliyeed u galeen sidii ay isaga dulqaadi lahaayeen heeryadii gumeystaha, ugana dhaxli lahaayeen dowladnimo sal adag oo ay iyagu leeyihiin.
Wuxuu shacabka Soomaaliyeed ugu baaqay inay:
Mar walba xusuustaan halgankii iyo taariikhdaas dahabiga ah,
U duceeyaan halyeeyadii nafahooda iyo dhiiggooda u huray xorriyadda, gobannimada iyo dowladnimada aan maanta haysanno.
“Hambalyo Munaasabadda 1-da Luulyo,” ayuu ku soo gabagabeeyay farriintiisa, isagoo muujiyay dareen qaranimo iyo wadaninimo ku dheehan xusuusta maalinta taariikhiga ah.
